Aðalfundur félagsins var á miðvikudagskvöld í Gamla salnum, Elliðavatni.
Eftir fundinn var afar áhugavert erindi um trjárækt í Reykjavík, framtíðarhorfur, umgjörð og tengsl við lýðheilsu. Aaron Z. Shearer, sérfræðingur í þéttbýlisskógrækt, fjallaði meðal annars um hve lítil laufþekja er í Reykjavík miðað við sambærilegar borgir. Enda staða trjágróðurs veik í borgarskipulaginu. Þá sagði hann frá mælingum á borgartrjám í Reykjavk sem og verðmætamati, út frá ólíkum mælikvörðum.
Aðalfundurinn hófst á hefðbundnum aðalfundarstörfum undir fundarstjórn Áslaugar Helgadóttur. Jóhannes Benediktsson, formaður félagsins, fór yfir starf félagsins á síðasta ári og fjallaði um þau verkefni sem fram undan eru.
Vilhjálmur Þ. Vilhjálmsson, sem setið hefur í stjórn félagsins síðustu 23 ár, gaf ekki kost á sér til endurkjörs. Honum var þakkað vel fyrir gott og öflugt starf í þágu félagsins.
Í stað Vilhjálms var Einar Sveinbjörnsson kjörinn í aðalstjórn félagsins. Einar hefur verið í varastjórn. Ný í varastjórn var kosin Sigríður Auður Arnardóttir.
Á fundinum kvöddu sér hljóðs fulltrúar tveggja landnemafélaga í Heiðmörk –Akóges og Sameykis. Bæði félögin hafa unnið gríðarlega verðmætt starf, sem teygir sig yfir áratugi, við að rækta upp illa farið land og búa fallegan skóg með ríkri náttúru sem um leið er sannkallaður sælureitur fyrir íbúa höfuðborgarsvæðisins. Fulltrúar landnemafélagana lýstu ánægju með samstarfið við Skógræktarfélag Reykjavíkur og lögðu áherslu á mikilvægi þess að áfram yrði unnið að skógrækt og skógarumhriðu í Heiðmörk, og að málum yrði þannig háttað að sem flest fólk gæti notið útiveru og sótt endurnæringu í skóglendið.
- Að fundarstörfum loknum, flutti Aaron Z, Shearer erindi eins og áður segir. Vert er að nefna betur nokkra þætti sem hann kom inn á.
- Laufþekja í Reykjavík er 8,7% og vísbendingar um að hún fari minnkandi! Þetta er afar lítið miðað við sambærilegar borgi, svo sem í Noregi, Svíþjóð, Finnlandi eða annars staðar í Evrópu. Oft er miðað við að laufþekja ætti að vera um 30%. Til samanburðar er hún 33% Egilsstöðum og 20 % Akureyri. Á Suðurnesjum er hún hins vegar mjög lítil, 0-1%.
- Aaron benti á að í Reykjavík eru tré aðallega í einkagörðum og almenningsgörðum, en síður meðfram götum og gangstéttum. Það skortir því á að þau séu hluti af götumyndinni.
- Aaron fjallaði einnig um verðmæti trjágróðurs í Reykjavík út frá ýmsum mælikvörðum, svo sem mengunarhreinsun og kolefnisbindingu og sjónrænu verðmæti.
- Borgarskógarnir binda um 40 gígatonn af kolefni og árlega bætast 2.100 tonn við. Þá nema trén árlega hátt í 20 þúsund kíló af svifryki úr loftinu.
- Heildarverðmæti skóglendis í borgarlandinu var áætlað um 576 milljarðar kr.
- Fjórar trjátegundir mynda 78% af borgarskógum Reykjavíkur: Ilmbjörk, alaspaösp, sitkagreni og reynir. Þessi litla fjölbreyttni eykur áhættu af skaðvöldum og loftslagsbreytingum. Það eru þó margar aðrar tegundir í borginni. 62 eru skráðar, þótt einstaklingar margra þeirra séu fáir.
Aaron birti nýlega vísindagrein í „Arboricultural Journal“ sem full ástæða er til að mæla með. Hægt er að nálgast greinina hér: https://www.tandfonline.com/doi/full/10.1080/03071375.2025.2468110
Ársskýrsla Skógræktarfélags Reykjavíkur 2024 er aðgengileg hér.
https://heidmork.is/um-skogræktarfelag-reykjavikur/utgefið-efni/
