Oslóartréð var fellt í Heiðmörk í gær. Tréð er rúmlega tólf metra hátt sitkagreni sem líklega var gróðursett árið 1972. Dagur B. Eggertsson borgarstjóri felldi tréð með aðstoð Sævars skógarvarðar. Oslóartréð – jólatré Reykvíkinga – kom upphaflega sjóleiðina frá Noregi, sem tákn um vináttu borganna. Síðustu ár hefur verið hægt að sækja það í Heiðmörk, vegna þess hve vel skógurinn hefur vaxið og dafnað.
Kveikt verður á ljósunum á Oslóartrénu á Austurvelli núna á sunnudag, við hátíðlega dagskrá.
Jólatré Þórshafnarbúa hefur einnig komið úr Heiðmörk síðustu ár og hafa Eimskip flutt það til Færeyja. Kveikt var á ljósum trésins á Tinghúsvellinum síðasta laugardag.
