Hér á síðunni má sjá lýsingar á nokkrum gönguleiðum í Esju og nú kemur ein í viðbót:
Brattgengir borgarbúar sem vilja tilbreytingu frá hinni hefðbundnu gönguleið á Esjuna úr Kollafirði upp á Þverfellshorn –og sömu leið niður aftur,- geta sem best lagt á bílastæðinu austan við Esjuberg og gengið hinn svokallaða Gljúfurdalshring.
Farið er með girðingu og skáhallt upp klettana vestan við Flóðará og síðan jafnan halla á Kerhólakamb (ca 850 m). Þangað er amk eins og hálfs klukkustundar ganga í góðu færi. Fýll, hrafn, sólskríkja og lóa eru einkennisfuglar á þessum slóðum og láta vel í sér heyra, en bakgrunnshljóðin eru umferðarniðurinn frá hringveginum og skothvellir sem berast neðan frá æfingasvæðinu á Álfsnesi.
Það er rétt að kasta mæðinni á toppnum á Kerhólakambi og fá sér kaffisopa og samloku hjá stóru vörðunni ofan við hengiflugið og skanna fjallahringinn. Í góðu skyggni má sjá norður á Langjökul og lengra. Fyrir neðan blasir Blikdalurinn við, hann skerst inn í Esjuna að vestan og Tindstaðafjall hinumegin dalsins.
Gengið er austur grýtta hásléttuna og er þá Gljúfurdalurinn á hægri hönd, gróinn í botni en skriður hið efra og nokkur illfær gljúfur utan til. Klöngrast niður Þverfellshorn að Steininum (ca 600 m), þar sem algengt er að kasta kveðju á móða göngumenn á uppleið frá bílastæðinu við Kollafjörð.
Framundan er ganga sunnan Gljúfurdalsins út Langahrygg (ca 480 m). Það er drjúgur spölur en undan fæti og best að fara alveg fram á brún þar til sést niður á bílastæðið og sveigja þá til hægri og sikksakka niður bratta, en þó hættulausa skriðu.
Komið á bílastæðið og hringnum lokað eftir fjögurra til fimm klst göngu.
-Á myndunum hér fyrir ofan sést inn Gljúfurdalinn, uppgönguleiðin og loks út Langahrygg frá Steininum.
KB