Gróðursetningar, stígagerð, nýir bekkir og viðhald — það hefur mikið verið um að vera í Heiðmörk í sumar.
32.000 trjáplöntur voru gróðursettar í Heiðmörk í vor. Haustgróðursetningar eru hafnar og búið að gróðursetja talsvert af birki við Hraunslóð og Silungapoll. Alls verða um 200.000 plöntur gróðursettar á þessu ári á svæðum félagsins í Heiðmörk, að Múlastöðum, í Úlfarsfelli og Esjuhlíðum.
Nokkur borð með áföstum bekkjum hafa verið sett á valda staði í Heiðmörk. Húsgögnin eru ávöxtur samstarfs við Fangaverk, nánar tiltekið fangar sem vinna á trésmíðaverkstæðinu á Litla-Hrauni, sem smíðuðu borðin og bekkina fyrir Skógræktarfélag Reykjavíkur. Nokkur eintök eru til sölu í verslun félagsins í Smiðjunni nærri Elliðavatnsbænum.
![Eitt af borðunum með áföstum bekkjum, sem sett voru á valda staði í Heiðmörk í sumar.](https://heidmork.is/wp-content/uploads/2023/08/IMG_1378-e1690462195323.jpeg)
![fangabekkir](https://heidmork.is/wp-content/uploads/2023/08/fangabekkir.jpg)
![Osvaldo og Snorre starfsnemar setja upp afmarkanir á bílastæðinu við Hjallaflatir.](https://heidmork.is/wp-content/uploads/2023/08/20230726_143310.jpg)
Þá hefur verið borið ofan í stíga, ýmiskonar viðhaldi og tiltekt sinnt, og þök máluð á áningarhúsi og klósetthúsi við Helluvatn.
Loks hafa talsverðar endurbætur verið gerðar á Elliðavatnsbænum, bæði á þessu ári og í fyrra. Veturinn var ansi kaldur framan af, vegna þess að ofnar í húsinu voru bilaðir. Búið er að setja upp nýja ofna og varmadælukerfi í húsi. Vonast er til að þetta geri kyndingu hússins enn umhverfisvænni og einnig ódýrari. Samhliða þessu er verið að endurnýja vatnslagnir í Elliðavatnsbæinn. Þá er verið að skipta um þakglugga á húsinu.
![Það veitti ekki af að mála þakið á salernishúsinu við Helluvatn.](https://heidmork.is/wp-content/uploads/2023/08/20230621_113151.jpg)
![Salernishúsið og áningarhúsið við Helluvatn.](https://heidmork.is/wp-content/uploads/2023/08/Helluvatn1.jpeg)
![gongustigabraut](https://heidmork.is/wp-content/uploads/2023/08/gongustigabraut.jpg)
![Lagnir lagðar við Elliðavatnsbæinn.](https://heidmork.is/wp-content/uploads/2023/08/20230620_135153.jpg)