Nú er vorlegt um að litast í Heiðmörk og fjölgar gestum sem þangað sækja ár frá ári. Það er kominn vöxtur í allan gróður, flugan lætur finna fyrir sér og veiðin í vatninu hafin fyrir nokkru síðan. Farfuglar eru mættir á staðinn og láta vel í sér heyra, nú síðast sá sjaldgæfi fugl himbrimi (sjá mynd).
Skógræktarfélagið stendur fyrir Vormarkaði á Elliðavatni í annað sinn dagana 13.-15. maí næstkomandi. Á föstudegi er opið klukkan 15-18, en 10-18 laugardag og sunnudag. Félag trérennismiða er með stóra sölusýningu í Gamla salnum og verður með heitt á könnunni. Þá verður sýnikennsla í listinni að renna í tré úti á hlaði. Á laugardeginum er opin hestaleiga, þar sem teymt er undir börnum í gerði við bæinn. Þá verður kynning á stafgöngu á vegum ÍSÍ eftir hádegi og síðdegis verður síðan Vorblót að Vatni á vegum Ásatrúarmanna, sem bjóða öllum að fagna gróandanum með sér. Fuglavernd og Ferðafélag Íslands verða með kynningu á starfseminni og bjóða fólki í fræðslugöngur á meðan á Vormarkaðnum stendur. Áhugafólk um veiði getur kynnt sér fluguhnýtingar á föstudegi og um helgina verða kennd undirstöðuatriðin í að kasta flugu og kastkeppni fer síðan fram á sunnudag.Gámaþjónustan býður öllum upp á ókeypis moltu í garðinn -og ekki má gleyma Skógræktarfélaginu sem hefur til sölu hnaustré, eldivið, bolvið og kurl og einnig munu skógarmenn sýna nýjustu vélar sínar að störfum á laugardeginum.
___________________________________________________________________________________________________________________ |