Finnmörk er landnemaspilda Finna í Heiðmörk, við Strípsveg, nærri Skógarhlíð. Mikið var gróðursett í Finnmörk á níunda áratugnum en síðustu ár hefur starfið þar legið nokkuð í láginni. Þar til nú.
Síðasta haust voru stígar á svæðinu skipulagðir og talsvert gróðursett af nýjum trjáplöntum – finnskum birki-, greni-, og furutrjám. Til stendur að leggja göngustíga og útbúa áningarstað í Finnmörk næsta sumar.
Verkið er unnið með fulltingi finnska sendiráðsins og er hluti af framlagi Finna á Íslandi til friðlandsins í Heiðmörk. Finnska listakonan Anu Miettinen hefur komið til landsins í tvígang til að vinna að endurbótum á Finnmörk, sem eru hluti af listaverki hennar „Circulation“.
Miettinen hefur unnið umhverfislistaverk meðal annars á eyjunni Vartiosaari. Eyjan er skógi vaxinn og með fjölbreytta náttúru en um leið örstutt frá miðborg höfuðborgarinnar Helsinki.
