Skógarleikarnir í Furulundi í Heiðmörk
Hinir árlegu Skógarleikar verða haldnir laugardaginn 7.júlí í Heiðmörk. Eins og fyrri ár býður Skógræktarfélag Reykjavíkur til ævintýralegrar stemningar í Furulundi þar sem töfrar skógarins fá að njóta sín. Keppnin sjálf vekur ávallt mikla athygli þar sem skógarhöggsmenn leiða saman hesta sína og keppa í hefðbundnum skógarhöggsgreinum svo sem axarkasti, sporaklifri, bolahöggi og afkvistun trjábola.
Gestum á öllum aldri er boðið upp á að spreyta sig í tálgun úr ferskum við beint úr skóginum undir leiðsögn tálgumeistara. Félagið leggur mikið upp úr því að sýna skóginn í sinni fjölbreyttustu mynd og í ár verður sýnt hvernig hægt er að náttúrulita efni með hráefni úr skóginum.
Það verður að sjálfsögðu grillað snúrubrauð yfir varðeldi og rjúkandi ketilkaffi verður í lundinum ásamt grillveislu sem að Skógræktarfélagið býður upp á. Skógarleikja teepeetjaldið verður reist að vanda og þar verður seiðandi stemmning.
Skógræktarfélagið hlakkar mikið til og býður alla hjartanlega velkomna í Furulund 7.júlí!
Hægt er að fylgjast með undirbúningi keppninnar á instagram @skograektarfelagreykjavikur
Facebook: Smellið hér
Keppnisstjóri Skógarleikanna er Gústaf Jarl Viðarsson, dómari Böðvar Guðmundsson og kynnir Björn Bjarndal Jónsson.
Frekari upplýsingar veitir Skógarleikjastjórinn Guðfinna Mjöll Magnúsdóttir í síma 690-9874.