Áform um Græna stíginn eru smám saman að skýrast. Stígurinn verður um 50 kílómetra útivistarstígur sem nær allt frá Hafnarfirði til Esjunnar. Skýrsla um stíginn — drög að frumgreiningu — hefur nú verið birt.
Græni stígurinn verður samfelldur göngu- og hjólastígur, sem liggur eftir endilöngum Græna treflinum og lengra, bæði til norðurs og suðurs. Græni trefillinn er samfellt útivistarsvæði við efri jaðar borgarbyggðarinnar. Honum er lýst svona í frumgreiningunni, sem unnin voru fyrir Samtök sveitarfélaga á höfuðborgarsvæðinu:
„Trefillinn teygir sig frá Esjuhlíðum í norðri til Helgafells í suðri og tengist þannig fjalllendi Esjunnar, Bláfjallafólkvangi og jarðvangi Reykjanesfólkvangs. Græni trefillinn fléttar saman skógarteiga, hraun, vötn og fell. Áhersla er lögð á verndun sérstæðs landslags og lífríkis. Þar er aðstaða til fjölbreyttrar útivistar svo sem athafnasvæði hestamanna og golfvellir sem og fjölbreytt náttúra, hraunbreiður og votlendi, ræktaður skógur og náttúrulegt kjarr. Í treflinum skal skógrækt stunduð í sátt við sérkenni landslags og náttúrufars, til skjóls og yndisauka, til bættra útivistarskilyrða, til að hefta ösku- og jarðvegsfok og bindingar kolefnis og svifryks frá umferð.“
Drögin hafa verið kynnt kjörnum fulltrúum í sveitarfélögunum sem að verkefninu koma. Hægt er að skoða drögin hér.