Fuglalíf í vaxandi skógi

Uppgræðsla og skógrækt í Heiðmörk hefur getið af sér sterkt og fjölbreytt vistkerfi. Gróðursælt og skjólgott svæðið laðar ekki bara að sér manneskjur því í Heiðmörk er auðugt fuglalíf.

Í Heiðmörk er mólendi, hraun, votlendi, stórt stöðuvatn og auðvitað skógar. Fjölbreytileiki lífríkisins er í samræmi við það. Í Heiðmörk eru margar sjaldgæfar fuglategundir og tegundir sem eru á válista, svo sem brandugla, gargönd og himbrimi. Einnig hefur sést til fjölda gesta – allt frá innlendum tegundum á borð við haförn og skeiðönd til erlendra flækinga, til að mynda gráhegra og trjásvölu.

Suma fuglanna er erfitt að koma auga á. Til dæmis glókoll, minnsta fugl Evrópu, sem sést á myndinni hér að ofan, sem Hafsteinn Björgvinsson tók í Heiðmörk. Glókollur er nýbúi á Íslandi og verpir í Heiðmörk. Glókollur lifir einkum á sitkalús og tilkoma hans á Íslandi því nátengd vexti greniskóga. Aðrir fuglar eru meira áberandi, til að mynda himbrimi sem siglir tignarlega um Elliðavatn á sumrin. Enn aðrir gera sér fögur hreiður í almannaleið, eins og flórgoðinn. Undanfarin ár hefur flórgoðapar gert sér flothreiður í vík nokkurrri í Heiðmörk, í skjóli nokkurra trjágreina sem fuglavinir hafa komið fyrir úti í vatninu. Tegundir á borð við rjúpu og skógarþröst njóta einnig góðs af hinu vaxandi skóglendi.

Fjölbreyttast er fuglalífið í votlendi, en þéttleikinn er mestur í barrskógi og lúpínu. Skógurinn í Heiðmörk er í vexti og fuglalífið að breytast með. Fuglategundum sem lifa í skóglendi hefur fjölgað á kostnað mófugla.

Nýjustu skýrslu Veitna um fuglategundir í Heiðmörk má nálgast hér. Rannsókn Jóhanns Óla Hilmarssonar, sem birt var 2010, er aðgengileg hér.