Um þessar mundir skartar lúpínan sínu fegursta í Heiðmörk. Margar aðrar tegundir vaxa og dafna í litríku sambýli við  lúpínuna eins og kunnugt er. Á myndinni fyrir ofan sem var tekin í vegkanti á Hjallaflötum, má til dæmis sjá njóla, skógarkerfil, súru, túnfífil, brennisóley og garðableikju.

Kópavogsbær sakaður um skemmdarverk

Kópavogsbær var í dag dæmdur í Héraðsdómi Reykjaness til að greiða Skógræktarfélagi Reykjavíkur tæpar 20 milljónir króna auk vaxta og málskostnaðar vegna skemmda sem unnin voru á trjám í Heiðmörk í febrúar 2007. Skemmdirnar voru unnar þegar verktaki á vegum Kópavogsbæjar gróf fyrir vatnsveitu án þess að framkvæmdaleyfi lægi fyrir. Trén voru meðal annars í Þjóðhátíðarlundi þar sem trjám hefur verið plantað frá árinu 1974. Kópavogsbær taldi sig hafa fengið heimild til framkvæmdanna með samningi við Reykjavíkurborg árinu áður en á það var ekki fallist. Alls þarf Kópavogsbær að greiða um 30 milljónir króna í skaðabætur, dráttarvexti og málskostnað. (Úr fréttum ruv 19.06.www.ruv.is  ) Hér má sjá dóminn í heild sinni:

http://www.domstolar.is/domaleit/nanar/?ID=E200702651&Domur=3&type=1&Serial=1&Words=

Vinnuskóli Reykjavíkur lætur til sín taka í Heiðmörk eins og áður, en nú eru reyndar óvenju margir að störfum hjá okkur. Á myndinni sjást hópar Elsu Þórdísar og Sigurðar Rúnars flokksstjóra við beðahreinsun og kantskurð hjá Elliðavatnsbænum. Á neðri myndinni sjást unglingarnir mála kantsteina.  

Alaskalúpína var fyrst gróðursett í Heiðmörk 1959 og hefur því í hálfa öld undirbúið ófrjóan jarðveginn fyrir gróðursetningu trjáa. Á myndinni má sjá alaskaösp í lúpínubreiðu sem er byrjuð að blómstra  í Hrossabrekkum, en þar var jarðvegurinn plægður fyrir fjórum árum og ýmsar trjátegundir gróðursettar í plógfarið á eftir. Öspin er sem kunnugt er ,,spretthlaupari" við svona aðstæður, en tegund eins og sitkagreni fer sér hægar þó á endanum verði grenið ríkjandi tegund.

Laugardaginn 30. maí stendur Skógræktarfélag Reykjavíkur fyrir fuglagöngu í Heiðmörk undir leiðsögn Einars Þorleifssonar náttúrufræðings. Farið verður frá Elliðavatnsbænum í Heiðmörk klukkan 10.00 og við fræðumst um farfugla jafnt sem staðfugla og ýmsa spennandi flækinga. Eftir gönguna sýnir Einar ýmsar gerðir af fuglahúsum og fræðir fólk hvernig laða megi fugla að í görðum. Reikna má með að atburðurinn taki um tvo tíma.
Gangan er ókeypis og öllum opin.

Dómnefnd Skógræktarfélags Reykjavíkur hefur valið Tré mánaðarins í maí  og er það birki (Betula pubescens) í garði við Háteigsveg 36. Ábending um þetta tré barst frá Einari Ó. Þorleifssyni og kunnum við honum bestu þakkir fyrir.  Húsið  byggðu þau Halldór Kr. Þorsteinsson og Ragnhildur Pétursdóttir árið 1920 og hét það   upphaflega  Háteigur.  Að sögn eiganda hússins, Guðnýjar Ó. Halldórsdóttur, var birkið gróðursett milli 1930-40. Birkitrén voru reyndar fleiri  framan við húsið í upphafi en fljótlega tók umrætt tré forystuna hvað varðar vöxt og þrótt og voru hin trén þá felld og þetta eina sem eftir stendur  fengið að njóta sín svo um munar. Gömul svipmikil tré  hafa lengi verið kallaðar ,,eikur“ hér á landi  og þykja til mikillar prýði.  Hæðin er 6,7 metrar, ummál stofns í 0,6 m.  hæð frá jörðu er 1,55 m. og þvermál krónu um 8,4 m.

Um það bil 80% birkitrjáa  landsins eru undir tveimur metrum  á hæð, en hæsta birki landsins er tæpir 15 metrar. Að útliti og vaxtarlagi eru trén margbreytileg, beinvaxin eða kræklótt, einstofna eða margstofna, með gráleitan, búnleitan eða ljósan börk sem flagnar í þverspæni.  Það er því úr mörgu að velja og mikil blöndun í gangi í náttúrunni. Undanfarin ár hefur verið unnið að kynbótum og er almennt stefnt að beinvöxnum trjám með ljósum berki.  Bæði hafa verið valin úrvalstré úr Bæjarstaðaskógi og eins ræktuð tré undir heitinu Embla, en forfeður Emblunnar eru stásstré í Reykjavík og nágrenni. Ekki er vitað til að birkið  við Háteigsveg 36 hafi verið kynbætt á einn eða neinn hátt,  það var líklega keypt í Fagrahvammi í Hveragerði á sínum tíma og stendur fyllilega fyrir sínu.

Nú eru landnemarnir að koma aftur og huga að spildum sínum enda sumar í lofti. Skaftfellingafélagið er eitt það öflugasta um þessar mundir og á meðfylgjandi myndum má sjá burtflutta Skaftfellinga að störfum í reit sínum við Hraunslóð fyrir skömmu.

Nýr og óvenjulegur aðkomufugl olli usla hjá skógarþröstum og svartþröstum nú í morgun og við nánari athugun reyndist þar vera hringdúfa á ferð. Hringdúfa er mjög stór dúfutegund, gráleit með áberandi hvítan blett á hálsinum. Bringan er ryðlit og á vængjum er hvítt þverbelti. Hringdúfa sem er algengur skógarfugl um mestalla Evrópu er árlegur flækingur hér á landi. Hringdúfur hafa nokkrum sinnum reynt varp hérlendis svo vitað sé, meðal annars austur í Öræfum.

Taumönd (Anas querquedula) - Garganey sást við Elliðavatnsbæ í gær, en hún er afar sjaldgæfur fugl og sést sjaldan á Íslandi.