Hlaðsalan á Elliðavatni verður opin

fram að jólum frá kl 10-17.

Eldiviður og nýhöggvin jólatré úr skógum

Skógræktarfélagsins á góðu verði!

Skyrgámur mætti  á Hlaðinu og í Barnastundinni í Rjóðrinu í dag. Hér sést hann  sýna  töfrabrögð, sem vöktu mikla athygli barna á staðnum. Á neðri myndinni má sjá viðbrögðin.

Á morgun er síðasti  dagurinn í hinum vinsæla Jólaskógi í Hjalladal og einnig er Jólamarkaðurinn á Elliðavatni opinn í síðasta sinn.

Jólatrjáasalan á Hlaðinu á Elliðavatni verður hinsvegar opin alveg fram að  jólum.

Allt er nú til reiðu að taka á móti borgarbúum í Jólaskóginum í Heiðmörk í fyrramálið.  Hann verður opinn meðan birtu nýtur um helgina, hægt er fá lánaðar sagir á staðnum og eitt verð er fyrir öll tré, það sama og undanfarin ár: 4.900 krónur/stk. Varðeldur verður kveiktur á staðnum og kakó og piparkökur handa öllum. Jólasveinar til aðstoðar. Útlit er fyrir fyrir kalt og stillt veður og sannkallaða jólastemmningu í Hjalladal.

Á myndinni sést ungur maður á spjalli við Hurðaskelli í Rjóðrinu um síðustu helgi.

Laugardagur 19. desember:

Kl. 12.30:  Gamli salurinn:  Harmonikkusveitin Fönix.

Kl. 13.00:  Gamli salurinn:  Ritvélin les úr bókinni Hestar eru tvö ár að gleyma.

Kl. 14.00:  Barnastund í Rjóðrinu: Leikir, varðeldur, jólaveinn.  Anna Ingólfsdóttir les úr Mjallhvít.

Kl. 14.45:   Fundasalurinn:  Kristín Arngrímsdóttir les úr Arngrími apaskotti og fiðlunni.

Kl. 15.00:   Fundasalurinn: Timur Zolotusky fræðir gesti um íkona, erindi á ensku.

Sunnudagur 20. desember:

Kl. 12.30:  Gamli salurinn: Harmonikkusveitin Smárinn.

Kl. 13.00:  Gamli salurinn:  Mikael Torfason les úr bókinni Vormenn Íslands.

Kl. 14.00:  Barnastund í Rjóðrinu: Leikir, varðeldur, jólasveinn.  Gerður Kristný les úr Ballinu  á Bessastöðum.

Kl. 15.00:  Gamli salurinn:  Halla Norðfjörð spilar og syngur fyrir gesti

Jólamarkaður Skógræktarfélags Reykjavíkur á Elliðavatni verður haldinn í síðasta skiptið fyrir jól á Elliðavatni frá 11-17 um næstu helgi.

Eins og áður gefst fólki kostur á fá lánaðar sagir og höggva sitt eigið jólatré í skóginum í Hjalladal með aðstoð jólasveina. Varðeldur, kakó og piparkökur  verða á staðnum.Trén eru á sama verði og undanfarin ár, óháð stærð. Einnig verður hægt að velja úr miklu úrvali jólatrjáa á hagstæðu verði á  Hlaðinu við Elliðavatnsbæinn og er þar opið alla daga fram að jólum.

      Í morgun komu nemendur og kennarar Norðlingaskóla í sinni árlegu ferð til að velja og sækja jólatréð  fyrir skólann. Veðrið var með besta móti eftir ólætin í liðinni viku. Byrjað var  í dagrenningu á kakói og varðeldi í Rjóðrinu, síðan leitað að rétta trénu í Bæjarhólnum, það fellt og flutt niður á plan við Elliðavatnsbæinn.

Á efstu myndinni má sjá nemanda að lokinni kakódrykkju í leit að rétta trénu. Á mið myndinni er tréð flutt með sameiginlegu átaki niður að bænum.

       Á neðstu myndinni eru 1. bekkingar að velta sér í brekkunni neðan við bæinn. Í fjarska má sjá Norðlingaholtið.

Á laugardaginn kom hinn vinsæli Brokkkór, sem eins og nafnið bendir til er  kór hestamanna, og söng fyrir gesti í kaffihúsinu í Gamla salnum við mjög góðar undirtektir gesta. Kunnum við kórnum og stjórnanda hans Magnúsi Kjartanssyni bestu þakkir fyrir komuna. Kórsöngurinn er hluti af menningardagskrá Jólamarkaðsins, sem jafn óðum er kynnt hér á heimasíðunni.

Um tvö  þúsund manns komu í Jólaskóg Skógræktarfélags Reykjavíkur í Heiðmörk um síðustu helgi, en hann er opinn tvær síðustu helgarnar fyrir jól.

Samkvæmt hefð kom borgarstjóri ásamt fjölskyldu sinni á fyrsta opnunardegi og valdi sér tré þrátt fyrir rok og rigningu þann dag.  Á sunnudeginum var meiri straumur í Heiðmörkina enda veðrið betra, hlýtt og að mestu þurrt og náðu margar fjölskyldur að sækja  sitt eina og sanna jólatré  með aðstoð jólasveina á staðnum. Á eftir fengu allir kakó og piparkökur við varðeldinn í Hjalladal.

Margir lögðu einnig leið sína á Jólamarkaðinn á Elliðavatni sem opinn er fjórar helgar fyrir jól. Þar má líta úrval margskonar handverks, auk þess sem menningardagskrá er í gangi alla daga og að sjálfsögðu einnig tröpputré og úrval jólatrjáa úr skógum Skógræktarfélagsins á Hlaðinu við bæinn.

Hér er frásögn á vef Reykjavíkurborgar af ferð Hönnu Birnu Kristjánsdóttur og fjölskyldu í Hjalladal um helgina:

http://reykjavik.is/desktopdefault.aspx/tabid-757/521_read-18040/