Tré mánaðarins er garðahlynur (Acer pseudoplatanus) í garði við Bjarnarstíg 10.  Hæð hans   er 13,30 metrar, þvermál krónu um 10 m. og ummál stofns 1,40  m. í 1,50 m. hæð frá jörðu.  Tréð er óvenju beinvaxið af hlyn að vera og greinar tiltölulega stuttar og fíngerðar. Það fellir lauf frekar  snemma og er þannig betur aðlagað veðurfari hérlendis en gengur og gerist með hlyn. Það var líklega gróðursett  árið 1930 og  flutt inn frá Danmörku, eins og  algengt var á þeim tíma.
 
Hjónin Elísabet Helgadóttir og Bjarni Bjarnason, sem bæði voru  kennarar í Austurbæjarskólanum, byggðu húsið Bjarnarstíg 10 árið 1927.  Bjarni var mikill skógræktarmaður, sem ekki var algengt á þeim tíma. Eigandi hússins nú er sonur þeirra Sverrir Bjarnason píanókennari.
 
Náttúruleg heimkynni garðahlyns eru  í fjalllendi Evrópu frá Spáni í vestri og austur í Kákasusfjöll. Í Ölpunum vex hann upp í 2000 metra hæð yfir sjávarmáli.  Hann  hefur breiðst út norður eftir Evrópu allt til Tromsö í Noregi, en auk þess hefur hann verið fluttur  og gróðursettur víða um heim.  Þrífst allvel  á Hjaltlandseyjum og í Færeyjum.  Útbreiðslugeta hans er mikil, hann framleiðir mikið af fræi og þrífst vel í skugga á unga aldri og er það meðal annars  ástæðan fyrir því að sumstaðar eins og í Danmörku og Ástralíu hefur hann verið flokkaður  sem  ,,innflutt  ágeng  tegund” og orðið fyrir útrýmingarherferð stjórnvalda.
 
Króna garðahlynsins er yfirleitt regnhlífalöguð hér á landi. Börkurinn  grár og sléttur en verður hrufóttur með árunum og þykir mikið augnayndi. Blöðin handsepótt og frekar stór. Haustlitur gulur. Blóm gulgræn í hangandi klösum vinsæl meðal býflugna. Aldinið tvær hnotur með samvöxnum vængjum sem minna á þyrluspaða   þegar þær  svífa til jarðar, í miklum vindi geta fræin ferðast nokkur hundruð metra frá móðurtrénu.  Þolir mengun, salt og vind  þegar hann eldist en er viðkvæmur í uppeldi.  Hefur að mestu verið laus við sjúkdóma og önnur vanþrif hérlendis. Taldar eru allt að 150 tegundir af hlyni í  heiminum auk fjölmargra ræktunarafbrigða. Garðahlynurinn  hefur reynst best hér á  landi ásamt afbrigðinu purpurahlyn, en neðri hluti laufblaða hans er rauðfjólublár. Margar hlyntegundir  eru nú í tilraunaræktun  í Grasagarðinum í Laugardal.
 
Hlynurinn hefur mikið gildi í ræktun í görðum og opnum svæðum. Viður hans er ljós  og meðal annars notaður í parket, húsgögn  og hljóðfærasmíð, eins og fiðlur enda leiðir hann hljóð óvenju vel. Síróp er gert úr  vökva hlynsins og er það töluverður iðnaður í Norður-Ameríku, algengast er reyndar að tappa vökva af sykurhlyn (Acer saccharum). Hér á landi hafa tilraunir verið gerðar með framleiðslu síróps af hlyn, en nærtækara mun vera  að framleiða birkisíróp fyrst um sinn.
 
Hvergi á landinu er garðahlynurinn jafn algengur og í Reykjavík og verður hann meira áberandi í borgarlandslaginu með hverju árinu  sem líður.  Þekktasta tréð er  ráðhúshlynurinn  á horni Suðurgötu og Vonarstrætis gróðursettur 1918, annar  við hús Þorvaldar Thoroddsen Laufásvegi 5 frá 1888 og er  hann meðal  elstu trjáa borgarinnar. Þá eru mjög fallegir hlynir við Mímisveg, Guðrúnargötu og Rafstöðvarveg, svo fáeinir staðir séu nefndir.  Hann er greinilega  þess virði að rækta   áfram og helst þyrfti að leita markvisst að  kvæmum sem  eru betur aðlöguð  okkar mislynda veðurfari og kala minna. Hann nýtur sín almennt vel  á opnum svæðum og verður væntanlega notaður sem götutré í framtíðinni og í skjólbelti líkt og víða erlendis. Þar telst það líka kostur hve króna hans er umfangsmikil og kastar miklum kælandi skugga yfir hásumarið.  Hér var gerð tilraun fyrir nokkrum árum með að flytja inn sérræktaðan hlyn frá Svíþjóð og nota sem stásstré utan við  hús Orkuveitunnar á Bæjarhálsi og verður forvitnilegt að sjá hvernig honum reiðir af í framtíðinni. Flestir eru   stóru  hlynir borgarinnar rétt að slíta barnsskónum ef miðað er við þann 500 ára aldur sem hann nær við góð skilyrði suður í Evrópu.  Þess má geta til gamans að sverasti stofn garðahlyns sem vitað  er um er í þýsku Ölpunum í um 1000 metra hæð yfir sjó, ummál hans er 8,70 metrar.

Garðahlynurinn  við Bjarnarstíg 10 sómir sér einstaklega vel og er af mörgum talinn glæsilegasta tré sinnar tegundar á landinu .  Enginn verður svikinn af að gera sér ferð um  Bjarnarstíginn,  sem liggur milli Njálsgötu  og Skólavörðustígs  og heilsa upp á  umræddan hlyn, hann  blasir við frá götunni og er  jafn eftirtektarverður að  sumri sem vetri.

Blandskógur í Heiðmörk

Nú í byrjun árs hafa starfsmenn vinnuflokks Skógræktarfélags Reykjavíkur unnið að grisjun í tveimur mismunandi reitum. Annars vegar er hreinn Stafafurureitur sem bráðvantaði góða grisjun. Hins vegar hefur verið lokið grisjun á reit sem er blandskógur eins og þeir gerast bestir sem er um 0,3 ha að stærð. Reiturinn stendur nyrst á Hjallabrautinni hægra megin þegar ekið er til suðurs, beint upp af Myllulækjartjörn alveg við Hjallabrautina og sést því vel þegar ekið er eftir henni. Við grisjunina kom í ljós að í þessum reiti, sem er sennilega gróðursettur í kringum 1975, eru alls um 6 tegundir trjáa. Um er að ræða 4 megintegundir en þær eru Rússalerki, Sitkagreni, Rauðgreni og Stafafura. Einnig er þarna að finna nokkrar Bergfurur og eitt Reynitré.
Við grisjunina var reynt að skapa lerkinu sem best vaxtarrými en það er sérstaklega ljóselskt og þarf því mikið og gott rými eigi það að geta fullnýtt vaxtargetu sína. Einnig var lerkið lagað til með uppkvistun til að gera það beinna en sum trjánna voru ansi frjálsleg í vexti.
Á sama hátt var rauðgreninu gefið gott rými svo það nái sér á strik, en það er nokkuð lágvaxnara en sitkagrenið sem hefur vaxið þarna af miklum krafti sem og stafafuran.
Í dag stendur því eftir skemmtilegur blandskógur þar sem gott bil er á milli trjánna og ættu þau því að geta vaxið næstu 15 – 20 árin án frekari aðgerða. Sökum þess hversu rúmgott er í reitnum í dag er áætlunin sú að bæta enn um betur og flytja nokkrar tegundir af trjám inn í þennan reit  og jafnvel stækka hann lítillega til vesturs. Helstu tegundir sem áætlað er að bæta þarna inn eru fjallaþinur, fjallaþöll, reyniviður, birki, hlynur, alaskaösp og hugsanlega einhverjir berjarunnar.

Hér má sjá starfsmann Skógræktarfélags Reykjavíkur, Jökul Guðmundsson, virða fyrir sér vesturkant reitsins áður en grisjun hófst. Eins og sjá má á þessari mynd þá ægir þarna samn tegundum, lengt til vinstri er lágvaxið rauðgreni, þá sitkagreni og eins má sjá glitta í bæði stafafur og lerki.

Núna strax eftir grisjun er reitirnir frekar ógreiðfærir til gangs því allar greinar og smærri trjábolir eru skilin eftir, en þau munu rotna niður á skömmum tíma og nýtast þá sem áburður fyrir eftirstandandi tré.

Jökull virðir fyrir sér reitinn að lokinni grisjun. Eins og sést er þetta í dag fjölbreyttur opinn skógur með ýmsum tegundum af misjafnri stærð.

Vill Skógræktarfélag Reykjavíkur benda fólki sem áhuga hefur á skógrækt á að stoppa við í reitnum og virða hann fyrir sér. Þeir sem hafa áhuga geta rölt inn í reitinn og upplifa stemninguna sem myndast í þessum fallega stað. Beggja vegna við reitinn á Hjallabrautinni eru lítil stæði þar sem hægt er að leggja bíl og ganga inn á grisjunarsvæðið.

Með skógarkveðju
Ólafur Erling Ólafsson
Skógarvörður.

Verið var að troða gönguskíðabraut í Heiðmörk. Hringurinn byrjar við Helluvatn og sem leið liggur upp á Elliðavatnsheiði og tilbaka. Verið velkomin á skíði í skóginn.

Undirritaður var í dag samningur um Náttúruskóla Reykjavíkur af hálfu Reykjavíkurborgar, Náttúruskólans, Landverndar og Skógræktarfélags Reykjavíkur. Samningurinn var undirritaður í Rjóðrinu við Elliðavatnsbæ, en þann stað hefur Náttúruskólinn mikið notað á undanförnum árum í tengslum við útikennslu í grunnskólum borgarinnar. Að undirritun lokinni bauð Helena Óladóttir skólastjóri Náttúruskólans viðstöddum að smakka kræsingar eldaðar af 4. bekk ísaksskóla sem í vetur hlýtur menntun í heimilisfræðum í Rjóðrinu á Elliðavatni. Að neðan má sjá myndir frá undirrituninni og skólastofunni í Rjóðrinu. Það var hlýtt við eldinn þrátt fyrir að það kingdi niður snjó.

Skógræktarfélag Reykjavíkur og Endurmenntun LbhÍ vilja vekja athygli á opnu námskeiði á sviði blómaskreytinga sem haldið verður í húsnæði SE, Gamla sal, Elliðavatnsbæ í Heiðmörk þann 10. febrúar næstkomandi.

Skreyttu þína eigin veislu

Námskeiðið er opið öllum þeim sem vilja efla sig í gerð veisluskreytinga, hvort sem um er að ræða skírnarveislur, fermingar, brúðkaup, afmæli eða útskriftarveislur.

Á námskeiðinu mun Hjördís Reykdal margreyndur blómaskreytir kynna fyrir þátttakendum mismunandi útfærslur á einföldum skreytingum fyrir mismunandi veislur. Hjördís hefur margra ára reynslu við uppsetningu á veislum og býr því yfir reynslu sem nýst getur hverjum veisluhaldara afar vel. Á námskeiðinu mun hún koma inn á samspil lita og forma, ásamt því að leggja áherslu á að nýta vandlega þann efnivið sem við höfum.

Kennari: Hjördís Reykdal Jónsdóttir stundakennari við blómaskreytingarbraut LbhÍ.

Tími. Þri. 10. feb. 2009, kl. 19:30-22:30 í Reykjavík (4 kennslustundir)

Verð: 4.900kr.

Staðfestingargjald: Staðfesta þarf skráningu með því að millifæra 1.200kr (óafturkræft) á reikninginn 1103-26-4237, kt. 411204-3590.

Skráningar: Þetta netfang er varið fyrir ruslrafpósti, þú þarft að hafa Javascript virkt til að skoða það (fram komi nafn, kennitala, heimili, sími og nafn námskeiðs) eða hafa samband í síma: 433 5000.

Nánari upplýsingar um námskeiðið má finna hér og skráning á námskeið er hér.

Einnig má skrá sig í síma 433 5000

Haft verður samband við þátttakendur nokkrum dögum áður en námskeið hefst og þeir beðnir um staðfesta þátttöku. Eftir að námskeið hefst er greiðsluseðill sendur til greiðanda. Vinsamlegast athugið að ef skráður þátttakandi hættir við að sitja námskeið, en hefur ekki tilkynnt forföll með formlegum hætti til endurmenntunardeildar LBHÍ áður en námskeið hefst, eða hættir eftir að námskeið er hafið, þá mun LBHÍ innheimta 50% af námskeiðsgjaldi. Ef biðlisti er á námskeiðinu, mun námskeiðsgjaldið innheimt að fullu.

Hvanneyri - 311 Borgarnes - sími: 433 5000 fax: 433 5001 - netfang: Þetta netfang er varið fyrir ruslrafpósti, þú þarft að hafa Javascript virkt til að skoða það
Reykir – 801 Hveragerði, sími: 433 5303 fax 433 5309 – heimasíða: www.lbhi.is/namskeid
 

Nemendur Landbúnaðarháskólans í Skógfræði / Umhverfisdeild –Umhverfisskipulag, unnu á síðustu haustönn verkefni undir heitinu "Hönnun ogræktun útivistarskóga", og einblíndu á Hjalladal í Heiðmörk. Það var Hallgrímur Indriðason kennari sem leiddi hópinn og komu þau í vettvangskönnun tvisvar sinnum í Heiðmörkina síðast liðið haust. Hallgrímur afhenti SkógræktarfélagiReykjavíkur verkefni nemendanna í gær.

Í þessu verkefni voru gerðar tillögur að auknu útivistargildi Hjallaflata í Heiðmörk. Markmiðið með tillögunum var að gera svæðið eftirsóknarverðara fyrir fjölskyldur, félagshópa, hestamenn oggöngufólk, á fæti eða skíðum. Til að ná þessum markmiðum fannst hópnum að bæta þyrfti aðstöðu og þjónustu innan svæðisins, skipta svæðinu í minni rými eftir notkun, efla rýmiskennd og skjól með trjágróðri og bæta þann gróður sem fyrir er. Hönnunin hefur í för með sér að nauðsynlegt verður að leggja rafmagn og vatn inn á svæðið. Helstu svæðin yrðu útivistarskógur með rjóðrum, dagsvæði, tjaldsvæði, áning fyrir hestamenn og bætt bílastæði. Til stuðnings við svæðin yrðu sett upp grillhús, þjónustuhús, leiktæki, salernisaðstaða,upplýsingaskilti, hestagerði og göngustígar. Lýsing yrði sett við bílastæði og aðalgöngustíg.

Skógræktarfélag Reykjavíkur þakkar hópnum góða og skemmtilega vinnu. Vonandi verða margar að þessum góðu hugmyndum að veruleika í framtíðinni.

Skógræktarfélag Reykjavíkur þakkar samskiptin á árinu sem er að líða og óskar landsmönnum öllum farsældar á komandi ári.

Það er spennandi helgi framundan í jólalandinu í Heiðmörk, sem skartar sínum fegursta vetrasrkúða þessa dagana. Sígrænar greinar furutrjánna svigna af hvítum þungum snjó og jörð er alhvít.

Opið er í Jólaskóginum í Hjalladal klukkan 11 - 16 laugardag og sunnudag. Þar er sannkölluð gleðistemning, varðeldurinn logar og skógarmenn bjóða upp áheitt kakó og piparkökur. Rauðklæddir gestir úr nærliggjandi fjöllum syngja jólalögin með börnunum, fara í leiki og skemmta fólki.

Jólamarkaðurinn á Elliðavatni er opinn 11 - 17 báða dagana . Þar er handverksfólk með ríkulegt úrval af fallegum og hagnýtum munum á hagstæðu verði. Þar er einnig hægt að kaupa höggvin jólatré, tröpputré og á Verkstæðinu fæst mikið úrval af skreytingum og leiðisskreytingum úr náttúrulegum efniviði skógarins.

Upplestur og tónlist klukkan 12.00. Barnastund í Rjóðrinu klukkan 14.00

Sjá nánar undir Jólamarkaður / Dagskrá helgarinnar.

Auk þess verða óvæntar uppákomur og skemmtiatriði.

Sjá kort undir Jólamarkaður / Kort

Jólatrjáasalan á Hlaðinu á Elliðavatnsbæ verður einnig opin mánudaginn 22. desember og á Þorláksmessu.

Vegna mikillar eftirspurnar á íslenskum jólatrjám verður Hlaðsala Jólamarkaðarins á Elliðvatni opin alla virka daga klukkan 13 - 20 fram að jólum.

Það er Kristján Bjarnason garðyrkjufræðingur sem sér um hlaðsöluna og gefur góð ráð um meðhöndlun jólatrjáa.

Einnig er í boði mikið úrval af tröpputrjám (útitré á fæti), greinum og alls kyns skreytingum úr skógarefni, svo sem skreyttum leiðisgreinum og krossum.

Verið velkomin, það er yndisleg jólastemning á Hlaðinu á Elliðavatnsbæ þar sem Jólamarkaðurinn er um helgar.