Vaskur hópur barna af leikskólanum Rofaborg kom í skógarferð upp í Heiðmörk í dag undir leiðsögn Helenu Óladóttur, verkefnisstjóra Náttúruskólans. Þau voru svo heppin að hitta á starfsmenn Veiðimálastjóra við rannsóknir í Elliðavatni, sem leyfðu þeim að handleika fiskana sem verið var að rannsaka og fannst þeim það mjög gaman.

Skógræktarfélag Reykjavíkur var með tvær vélar til sýnis á Tækjasýningu Garðheima, sem haldin var 27. september. Annars vegar var um að ræða sérhæfða útkeyrsluvél og hins vegar eldiviðarvél.

Starfsmenn skógræktarfélagsins eru þessa dagana við haustgróðursetningar landgræðsluplantna í Esjuhlíðum. Á myndinni eru frá vinstri þeir Arnar, Daríus, Wojciech og Daníel í góðum gír í sólinni.

Sama dag og hópur norsks skógræktarfólks frá Sogni og Fjörðunum kom í Heiðmörkina kom líka hópur finnskra skógarbænda heimsókn undir leiðsögn Friðrik Aspelund. Starfsmenn skógræktarfélagsins buðu upp á skógarkaffi þar sem þeir voru við grisjun á 30 gömlum stafafurureit í Vífilstaðahlíð.

Hópur norsks skógræktarfólks frá Sogni og Fjörðunum var nýverið á ferðinni á Íslandi að kynna sér skógarmál hérlendis. Kom hópurinn í heimsókn á Heiðmörk þar sem gestirnir fengu kynningu á skógræktarfélögunum.

Norski hópurinn fékk sér hádegisverð í Gamla salnum með starfsfólki Skógræktarfélags Íslands og nokkrum starfsmönnum Skógræktarfélags Reykjavíkur (Mynd:ES).

Skógræktarfélags Reykjavíkur hefur umsjón með útivistarsvæði Reykjavíkur í Esjuhlíðum. Undanfarið hefur verið unnið að því að leggja braut meðfram göngustígum upp á Esjuna. Er hún lögð til að björgunarsveitir geti komist fljótt og örugglega til hjálpar ef einhver verður fyrir óhappi á gönguleiðinni, en gönguleiðin er mikið notuð af almenningi.

Pokasjóður og Reykjavíkurborg styrkja þessa framkvæmd.

 Unnið að brautinni í Esjuhlíðum (Mynd:Sk.Rvk.).

Borgartréð 2012 var formlega útnefnt við hátíðlega athöfn þann 18. ágúst og er það 112 ára gamall gljávíðir í garði Hressingarskálans við Austurstræti.

Garðurinn við Hressingarskálann er einn þekktasti einkagarður frá lokum nítjándu aldar og stóð við hús Árna Thorsteinssonar landfógeta í Reykjavík frá 1862. Garðurinn var nýttur til skrauts og nokkurra nytja og var jafnan kallaður Landfógetagarðurinn.  Gljávíðinn fékk Árni að gjöf frá Schierbeck landlækni og var víðirinn gróðursettur um 1900. Þegar Árni flutti inn í húsið var fyrir kartöflugarður og lítil skilyrði til garðræktunar. Lét hann smám saman grafa gryfjur í garðinn og fyllti þær með mold og áburði og tók verkið allmörg ár. Garðurinn var stór og í honum ræktaði Árni fjölda plantna, sem aldrei fyrr höfðu verið ræktaðar hér á landi. Hinum algengustu garðjurtum og innlendum skrúðplöntum var heldur ekki gleymt.

Gljávíðirinn hefur upplifað ýmislegt á sínum 112 árum. Fyrir nokkrum árum hallaðist hann á hlið í miklum stormi, en með aðstoð stoða hefur hann  náð að skjóta rótum að nýju. Þykkar greinar gljávíðisins eru sérlega vinsælar til klifurs hjá börnum, en gljávíðirinn hefur fjóra 30 cm þykka boli, er um 6-7 metra hár og um 8-9 metra langur.

Tréð var valið af Skógræktarfélagi Reykjavíkur í samstarfi við Reykjavíkurborg.

Skógræktarfélag Reykjavíkur hefur í gegnum tíðina verið með ýmislegt úr efniviði skógarins til sölu. Sem stendur er til á lager bæði kurl og eldiviður, sem upplagt er að nota í kamínuna nú þegar farið er að styttast í haustið!