Stefán Pétur Eggertsson, fv. formaður Skógræktarfélags Reykjavíkur, lést 8. janúar síðast liðinn 66 ára að aldri. Stefán Pétur sat í stjórn félagsins 2000-2007 og var formaður árin 2002-2007. Stefáns Péturs verður sárt saknað úr skógræktarstarfinu. Stjórn og starfsfólk Skógræktarfélags Reykjavíkur þakkar innilega fyrir það dugmikla starf og vinskap sem Stefán Pétur lagði af mörkum fyrir félagið. Eftirlifandi eiginkonu, Kristínu Gunnarsdóttur og fjölskyldu eru sendar innilegar samúðarkveðjur.

Mynd: mbl.is/Golli 

Jón Gnarr borgarstjóri, Þröstur Ólafsson, stjórnarformaður Skógræktarfélags Reykjavíkur og Bjarni Bjarnason, forstjóri Orkuveitu Reykjavíkur, skrifuðu undir samstarfssamning þann 3. janúar, um rekstur og þjónustu í Heiðmörk.

Sameiginlegt markmið aðila með samningnum er að standa vörð um neysluvatnsauðlindina í Heiðmörk, efla og bæta útivistarsvæði Reykvíkinga á svæðinu og gera það eftirsóknarverðara til útivistar. Auk vatnsverndar skal sérstök áhersla lögð á að halda við og bæta skóglendi í Heiðmörk, auk fræðslu til almennings, félagasamtaka og skóla.

 Aðilar eru sammála um að markmið þeirra fari að þessu leyti saman og séu í samræmi við megintilgang Skógræktarfélags Reykjavíkur, sem er að vinna að skógrækt , trjárækt og landbótum, auk fræðslu fyrir almenning í Reykjavík og víðar og stuðla að bættu samspili og lífsskilyrðum manna, dýra og gróðurs.

 Samningurinn er gerður til 10 ára og samkvæmt honum greiða Orkuveita Reykjavíkur og Reykjavíkurborg Skógræktarfélagi Reykjavíkur endurgjald fyrir þá þjónustu sem veitt er og nemur greiðslan til Skógræktarfélagsins fyrir árið 2013 tæplega 40 milljónum króna, þar af greiðir Reykjavíkurborg greiðir tæpar 33 milljónir og Orkuveitan tæplega 7 milljónir.

 F.v. Þröstur Ólafsson, stjórnarformaður Skógræktarfélags Reykjavíkur, Jón Gnarr borgarstjóri og Bjarni Bjarnason, forstjóri Orkuveitu Reykjavíkur, undirrita samstarfssamninginn.

Fjöldi manns lagði leið sína í jólaskóginn í Grýludal á Heiðmörk síðast liðna helgi til að ná sér í jólatré. Hér má sjá nokkrar svipmyndir frá helginni.

Jólamarkaðurinn á Elliðavatni opnaði síðustu helgi með pompi og prakt. Hann verður opinn allar helgar fram að jólum (sjá nánar í valmynd hér til vinstri). Hér má sjá nokkrar myndir frá fyrstu helginni.

Nú er aðventan á næsta leyti og allt komið á fullt hjá félaginu að undirbúa bæði Jólamarkaðinn á Elliðavatni og Jólaskóginn í Grýludal, auk þess sem félagið útvegar ýmsum aðilum skreytitré af ýmsum stærðum. Hér má sjá starfsmenn félagsins að störfum að fást við jólatré af stærri gerðinni.