 Jólaskógurinn í Heiðmörk.Það er orðin sterk hefð í mörgum fjölskyldum að koma í Heiðmörk á aðventunni og höggva sitt eigið jólatré. Í ár verður opið í Hjalladal í Heiðmörk helgarnar 12.-13. desember og 19.-20. desember klukkan 11 - 16.
Hanna Birna Kristjánsdóttir borgarstjóri mun höggva tré í Jólaskóginum laugardaginn 12. desember klukkan 12.30. Alla daga verður líf og fjör, jólasveinarnir verða á staðnum og það verður logandi varðeldur. Það er boðið uppá heitt kakó og piparkökur og jólalögin sungin. Sagir og klippur verða til útláns fyrir skógarhöggið. Það er sannkölluð jólastemning í skóginum!
Íslensk jólatré eru vistvæn. Þau eru ræktuð án eiturefna og eru ekki flutt á milli landa. Í staðinn fyrir hvert tré sem höggvið er gróðursetur Skógræktarfélag Reykjavíkur að minnsta kosti fimmtíu tré.
Það er sama góða verðið á jólatrjánum í Jólaskóginum og í fyrra, 4900 krónur - óháð stærð. Í boði er úrvals íslensk stafafura, barrheldin og vel ilmandi.
Leiðin er vel merkt, bæði frá innkomuleiðinni við Rauðhóla og Vífilsstaðahlíð. Einnig er hægt að sjá leiðbeiningar og kort á heimasíðunni heidmork.is.
Félagsmenn Skógræktarfélags Reykjavíkur fá 500 krónur í afslátt.
|
