Jólamarkaðurinn vinsæli á Elliðavatni opnar laugardaginn 1. desember og verður opinn allar helgar fram að jólum klukkan 11-16. Mikið úrval af íslensku handverki og hönnun í söluskúrum og í Gamla salnum og í Kjallaranum. Á Hlaðinu verða til sölu nýhöggvin íslensk jólatré og þar að auki mikið úrval af tröpputrjánum vinsælu. Einnig eldiviður og viðarkyndlar. 

Á hverjum markaðsdegi er kveikt upp í eldstæðinu á Hlaðinu og harmónikkusveitir leika nokkur lög. Auk harmónikkusveita hafa kórar boðað komu sína og von er á trúbadorum.

Gamli salurinn

Í Gamla salnum verður fjölbreyttur hópur handverksfólks með vörur sínar og að sjálfsögðu boðið uppá ilmandi nýbakaðar vöfflur og kakó. 

Rjóðrið

Rjóðrið er trjálundur rétt við Elliðavatnsbæinn þar sem hægt er að setjast á bekki kringum logandi varðeld. Barnastundin verður þar klukkan 14 og þá kemur barnabókahöfundur og les upp fyrir börnin.

Jólasveinar koma í heimsókn þegar nær dregur jólum og heilsa upp á börn og fullorðna.

Jólamarkaðurinn á Elliðavatni er dásamlegaur staður til að flýja ys og þys borgarinnar um stund og finna réttu jólastemninguna í friðsælu og fallegu umhverfi. Munið – það tekur aðeins 15 mínútur að aka frá miðbæ Reykjavíkur að Elliðavatnsbænum í Heiðmörk.

 Tengiliður Jólamarkaðar: Gústaf Jarl, netfang: gustafjarl (hjá) heidmork.is , sími: 856-0059